रासायनिक विषादी प्रयोग गर्ने उचित विधिहरु
चैत्र ३०, २०७७ | बबिन थापा
नेपालका अधिकांश कृषकहरू विषादिको प्रकार, विषको स्तर, सुरक्षाको, सावधानी तथा आफ्नो स्वास्थ्य र वरिपरी वातावरणमा सम्भावित हुन सक्ने असरहरू बारे अनजान छन् । रासायनिक विषादीहरु एकदमै आवश्यक पर्यो भने मात्रै प्राविधिक वा विज्ञको सल्लाह अनुसार प्रयोग गर्नु पर्छ I विषादीको प्रयोग गर्नु परेमा सहि विधिबाट आफ्नो स्वास्थ्य तथा वातावरणमा क्षति नपुग्ने गरि उचित विधिबाट पनिम्न अनुसार साबधानी पुर्वक गर्नु पर्छ।
विषादी प्रयोग गर्दा अपनाउने उचित विधिहरु:
- सबै भन्दा पहिला दक्ष प्राविधिकको सल्लाह अनुसार विषादी किन्ने र अनुपात मिलाएर मात्रै प्रयोग गर्ने ।
- विषादीको प्याकेट वा बोतलमा भएको लेबल, जानकारी र रङ्गको सङ्केत (हरियो, निलो, पहेंलो वा रातो) हेरेर सुरक्षित विषादीमात्र किन्ने, - अझ सकेसम्म हरियो लेबलको नभए निलो लेबलको विषादी मात्र प्रयोग गर्ने ।
- विषादी प्रयोग गर्दा सुरक्षित भएर जस्तै: मास्क, पञ्जा, चस्मा आदिको प्रयोग गर्ने ।
- चर्को घाम लागेको बेला, पान र हावा चलेको बेलामा विषादीको प्रयोग नगर्ने ।
- विषादी छर्कदा लक्षित क्षेत्र वा बाली बाहेक अन्यत्र नपर्ने गरी छर्कने ।
- विषादी छर्दा अगाडी गएर छर्दै छर्दै पछाडी तिर सर्दै आउने ।
- विषादी प्रयोग गर्दा केहि पनि खानेकुरा नखाने ।
- विषादी प्रयोग गरिसके पछि हात, खुट्टा, मुख, लगाएको कपडा र प्रयोग गरिएका सामग्रीहरू साबुन पानीले राम्रो सगँ धुने ।
- विषादी छर्न प्रयोग गरिएका स्प्रयेर, बाल्टी, मग आदि सामग्री सफा गरेर राख्ने ।
- बालबालिका र गर्भवती महिलाले विषादी प्रयोग नगर्ने ।
- विषादी प्रयोग गरिसकेको प्याकेट वा सिसी प्लास्टिकमा हालेर सुरक्षित तरिकाले खोला, पोखरी, गाइ बस्तु, बालबालिकाबाट अलि टाढा फाल्ने वा नस्ट गर्ने ।
- विषादी प्रयोग गरीसके पछि पर्खनुपर्ने अवधिको जानकारी लिएर मात्रै बाली टिप्ने ।
निम्न उल्लेखित बुँदाहरूको अपनाएर विषादीहरु बाट हुने हानिकारक असरहरू बाट आफु सँग सँगै वातावरण आफ्नो बालीलाइ पनि जोगाऔ ।